ᑐᓂᕐᑕᓂᐊᕐᑏᑦ ᐅᑉᐱᕈᓱᑉᐳᑦ ᐃᓄᕐᖄᕕᓃᑦ, ᑐᓃᑦ, ᐃᓄᑐᐃᓐᓇᖄᕕᓃᑦ ᐃᓄᐃᓪᓗ ᓯᐊᒻᒪᐸᓪᓕᐊᓯᓂᕕᓂᖏᓐᓂᒃ ᓄᓇᕕᒻᒥ 4,500 ᐊᕐᕌᒍᐃᑦ ᐊᓂᒍᕐᑐᑦ. ᐃᓄᑐᐃᓐᓇᖄᕕᓃᑦ, ᐃᓄᐃᑦ ᓯᕗᓪᓕᕕᓂᓪᓚᕆᖏᑦ, ᑎᑭᑦᑐᕕᓃᑦ ᑕᒪᐅᖓ 1000 CE ᐊᕐᕌᒍᐃᑦ ᒥᑦᓵᓂ. ᐊᓐᓇᐅᒪᒍᓐᓇᓯᐊᕐᑐᕕᓃᑦ ᕿᐅᔭᓇᕐᑐᒥ ᐅᑭᐅᕐᑕᑐᒥ. ᐱᕕᑦᓴᓯᐅᕐᑎᐅᓱᑎᒃ ᐃᓅᓯᓕᕕᓃᑦ, ᐃᓄᑐᐃᓐᓇᖄᕕᓃᑦ ᓯᑦᔭᒥᐅᖑᓐᓂᖁᑦ ᐊᖑᓇᓱᑦᑎᐅᓱᑎᒃ-ᐃᓱᒪᑐᔫᑦᓯᑎᓪᓗ-ᐃᓅᓲᕕᓃᑦ.

ᐃᓄᑐᐃᓐᓀᑦ ᖃᓪᓗᓈᓪᓗ ᑕᕆᐅᕐᔪᐊᑉ ᐊᑭᐊᓂᒥᐅᑦ ᑲᑎᖃᑎᒌᒋᖓᖕᖓᓚᐅᕐᓯᒪᔪᑦ 1800 ᐊᕐᕌᒍᖏᑦ ᐊᑑᑎᒋᐊᖕᖓᓕᕐᑎᓗᒋᑦ, ᐃᓄᑐᐃᓐᓀᑦ ᐃᓅᓯᒪᒐᓗᐊᕐᑎᓗᒋᑦ ᓯᕗᓕᕐᒥᑎᑐᑦ 1900 ᐊᕐᕌᒍᖏᑦ ᑎᑭᑦᓱᒋᑦ. ᐊᔪᕿᕐᑐᐃᔩᑦ ᒥᕐᖁᓕᓐᓂᐊᑏᓪᓗ ᖃᓪᓗᓈᖑᑦᓱᑎᒃ ᓯᕗᓪᓕᐹᖑᑦᓱᑎᒃ ᑕᕐᕋᓕᐊᕐᓯᒪᔪᑦ, ᓄᑖᓂᒃ ᐱᕐᖁᓯᖃᕐᓱᑎᒃ, ᓄᑖᓂᒃ ᐱᒻᒪᕆᐅᔪᖁᑎᖃᕐᓱᑎᒃ ᐊᒻᒪᓗ ᓄᑖᓂᒃ ᒪᙯᒍᑎᖃᕐᓱᑎᒃ, ᐃᖃᓗᓐᓂᐊᕈᑎᖃᕐᓱᑎᒃ ᒥᑭᒋᐊᕐᓂᐊᕈᑎᖃᕐᓱᑎᒃ.

ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᓯᕗᓪᓕᐹᖓᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᐅᑦᓱᓂ ᑲᓇᑕᒥ ᐊᑑᑎᔭᐅᓯᒪᔪᖅ, ᐃᓄᑐᐃᓐᓀᑦ ᓄᓇᒥᒃ ᓇᒻᒥᓂᕐᑖᑎᓪᓗᒋᑦ ᑯᐯᑉ ᑕᕐᕋᖓᓂ ᐊᓯᖏᓐᓂᓗ ᐱᒍᓐᓇᐅᑎᑖᕐᓱᑎᒃ. ᑖᓐᓇ ᐊᖏᖃᑎᒌᒍᑎ ᓴᐳᒻᒥᒍᑎᐅᔪᖅ ᐱᕐᖁᓯᑐᖃᕐᑎᒍᑦ ᐱᒍᓐᓇᐅᑎᒋᔭᐅᔪᓂᒃ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ ᐃᓂᓪᓓᒍᑎᐅᑦᓱᓂᓗ ᓲᓲᑦᓴᖃᑎᒌᑦᓯᐊᓗᑎᒃ ᐱᓇᓱᐊᕈᑎᐅᓂᐊᕐᑐᓂᒃ ᐃᓄᑐᐃᓐᓇᓄᑦ ᑲᕙᒪᓄᓪᓗ ᑯᐯᒻᒥ ᑲᓇᑕᒥᓗ. ᐊᖏᖃᑎᒌᒍᑎ ᐊᒥᓱᓂᒃ ᐃᓗᓕᖃᕐᑐᖅ, ᐃᓚᐅᑎᓪᓗᒋᑦ ᐊᖑᓇᓱᐊᕐᓂᖅ, ᐃᖃᓗᓐᓂᐊᓂᖅ, ᒥᑭᒋᐊᕐᓂᐊᓂᖅ, ᐃᓕᓐᓂᐊᓂᖅ, ᐃᓗᓯᓕᕆᓂᖅ, ᒪᑭᑉᐸᓕᐊᒐᓱᐊᕐᓂᖅ ᐊᒻᒪᓗ ᐃᓄᓕᒫᓂᒃ ᐊᐅᓚᑦᓯᒍᑏᑦ.

ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ ᓴᕐᕿᑎᑕᐅᓯᒪᔪᖅ 1978-ᖑᑎᓪᓗᒍ ᓄᓇᓕᓐᓂᒃ ᐊᐅᓚᑦᓯᔨᐅᑦᓱᓂ ᐊᑐᓂᑦ ᓄᓇᓖᑦ ᑲᕙᒫᐱᖏᓐᓂᒃ ᐊᐅᓚᑦᓯᓱᓂ ᐊᒥᓱᐃᓂᒃ ᐊᐅᓚᑕᖃᕐᓱᑎᒃ ᐃᓄᓕᒫᑎᒍᑦ ᐊᐅᓚᑦᓯᒍᑎᐅᔪᓂᒃ, ᐃᓚᐅᑎᓪᓗᒍ ᒪᑭᑉᐸᓕᐊᒐᓱᐊᕐᓂᖅ, ᐃᖏᕐᕋᔪᓕᕆᓂᖅ, ᐅᓖᓯᖃᕐᓂᖅ, ᑐᓴᕈᑎᓕᕆᓂᖅ ᐊᒻᒪᓗ ᓂᕐᔪᑏᑦ ᓴᐳᒻᒥᔭᐅᓂᖓᑦ. ᓄᓇᓖᑦ ᑲᕙᒫᐱᖏᑦ ᐊᐅᓚᑕᐅᓲᑦ ᓄᓇᓕᓐᓂ ᓂᕈᐊᕐᑕᐅᓯᒪᔪᓄᑦ ᐊᐅᓚᒍᓯᖃᕐᓱᑎᒃ ᑯᐯᑉ ᓯᕿᓂᖓᓃᑦᑐᑎᑦ ᓄᓇᓕᑦᑎᑐᑦ.

ᑯᐯᑉ ᑲᕙᒪᖓ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ ᐊᖏᖃᑎᒌᒍᑎᓕᐅᕐᓯᒪᔫᒃ ᓯᕗᓂᕐᒧᑦ ᐊᖏᖃᑎᒌᒍᑎᒥᒃ, ᑖᓐᓇ ᐊᑕᐅᓯᖕᖑᑎᑦᓯᒍᑎᐅᑎᓪᓗᒍ ᑮᓇᐅᔭᖃᕐᑎᓯᒍᑎᐅᓲᓂᒃ ᐊᒥᓱᐃᓂᑦ ᐱᒍᑦᔨᕕᐅᔪᓂᑦ ᐊᑕᐅᓯᕐᖕᖑᑎᑦᓱᒋᑦ ᑮᓇᐅᔭᑎᒍᑦ ᑐᕌᒐᕆᓲᖏᑦ. 30 ᐊᕐᕌᒍᑦ ᐊᓂᒍᕐᓯᒪᓕᕐᑎᓗᒋᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓ ᐊᑎᓕᐅᕐᑕᐅᓚᐅᕐᓯᒪᑎᓪᓗᒍ, ᑲᑎᒪᔩᑦ ᑲᑎᒪᓂᖃᕐᑎᓗᒋᑦ ᑰᒃᔪᐊᒥ ᐊᐅᒡᒍᓯ 2007-ᖑᑎᓪᓗᒍ, ᐱᓂᐊᕐᓂᓕᕆᓂᕐᑎᒍᑦ ᑐᑭᑖᕆᔩᑦ ᑲᕙᒪᓂ ᐃᓄᑐᐃᓐᓀᓗ ᓯᕗᓕᕐᑎᒍᑦ ᐊᖏᖃᑎᒌᑦᓱᑎᒃ ᓄᑖᓂᒃ ᐱᓇᓱᐊᕈᑎᐅᒍᓐᓇᑐᓂᒃ ᓄᓇᕕᒻᒥ ᐅᒃᑯᐃᓯᒍᑎᒋᑦᓱᒍ.

ᑏᓯᒻᐱᕆ 2007-ᖑᑎᓪᓗᒍ, ᑯᐯᒃ, ᐃᓄᐃᑦ ᐊᒻᒪᓗ ᑲᕙᒪᑐᖃᒃᑯᑦ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒥᒃ ᐊᑎᓕᐅᓚᐅᔪᔪᑦ ᐊᕙᓗᓕᕈᑎᐅᔪᒥᒃ ᐱᓇᓱᐊᕐᑕᐅᓂᐊᕐᑐᓄᑦ ᓄᓇᕕᒻᒥ ᓇᒻᒥᓂᖅ ᑲᕙᒪᑖᕋᓱᐊᕐᓂᒧᑦ. ᑖᓐᓇ ᓄᓇᓕᓕᒫᓂᒃ ᐱᒍᑦᔨᔨᐅᔪᖅ, ᐱᕈᕐᑎᑕᐅᒐᓱᐊᕐᓯᒪᔪᖅ ᑯᐯᒻᒥ ᐊᐅᓚᑦᓯᒍᑎᐅᔪᑦ ᐊᑐᕐᓱᒋᑦ, ᐃᓄᓕᒫᓂᒃ ᐱᒍᑦᔨᔨᐅᓂᐊᕐᑎᓗᒍ ᐊᑕᐅᓯᖕᖑᑎᑦᓯᒍᑎᐅᒐᓱᑦᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᓄᓇᕕᒻᒥ ᐃᓗᓯᓕᕆᔨᓂᒃ ᑲᑎᕕᒃ ᐃᓕᓴᕐᓂᓕᕆᓂᕐᒥᓗ.

ᔫᓂ 11, 2008-ᖑᑎᓪᓗᒍ ᑲᓇᑕᐅᑉ ᐅᖃᕐᕕᒪᕆᖓᓂ, ᑲᓇᑕᐅᑉ ᐊᖓᒧᕐᖄᖓ ᐃᓛᓂᐅᖕᖏᑑᕐᓂᖃᓚᐅᔪᖅ ᑲᓇᑕᒥᐅᓕᒫᓂᒃ ᑭᒡᒐᑐᕐᓱᓂ "ᒪᓕᒐᓕᐊᖑᓯᒪᔪᓄᑦ ᐊᓯᕈᐃᒐᓱᐊᕐᓂᒧᑦ" ᐱᐅᖕᖏᑐᕐᔪᐊᓂᓪᓗ ᐊᑑᑎᒍᑎᐅᓯᒪᔪᓄᑦ ᓄᓇᓕᑐᖃᕐᓄᑦ, ᐃᓄᑐᐃᓐᓀᑦ ᐃᓚᐅᑎᓪᓗᒋᑦ, ᐃᓕᓐᓂᐊᕆᐊᕐᑎᑕᐅᖃᑦᑕᓯᒪᔪᑦ ᑲᓇᑕᒥ. ᑖᓐᓇ ᐃᓛᓂᐅᖕᖏᑑᕐᓂᖓ ᐃᓚᒋᔭᐅᓚᐅᔪᔪᖅ ᐋᕐᕿᖃᑎᒌᒍᑎᐅᔪᓄᑦ ᐊᓪᓓᑦ ᐃᓕᓐᓂᐊᕆᐊᕐᑎᑕᐅᖃᑦᑕᓯᒪᓂᖏᓐᓄᑦ ᐊᓂᕐᕋᕆᖕᖏᑕᒥᓄᑦ, ᑖᒃᑯᐊ ᐊᖏᖃᑎᒌᒐᓱᐊᕈᑎᐅᓯᒪᔪᑦ ᐊᖏᕐᑕᐅᓱᑎᓪᓗ ᓄᓇᓕᑐᖃᕐᓄᑦ, ᑲᓇᑕᐅᑉ ᑲᕙᒪᖓᓄᑦ, ᑐᑦᓯᐊᕕᓐᓄᓗ ᐊᐅᓚᑦᓯᔨᐅᖃᑎᐅᖃᑦᑕᓯᒪᔪᓄᑦ ᐃᓕᓐᓂᐊᕕᓐᓂᒃ.

ᐁᕆᓕ 27, 2011-ᖑᑎᓪᓗᒍ. ᐃᓄᑐᐃᓐᓀᑦ ᓄᓇᕕᒻᒥᐅᑦ ᓂᕈᐊᕐᑎᑕᐅᓂᖃᕐᓯᒪᔪᑦ ᓄᓇᕕᒻᒥ ᓄᓇᓕᓕᒫᑎᒍᑦ ᑲᕙᒪᑖᕐᓂᒧᑦ. ᑕᒪᑦᓱᒪ ᐱᓇᓱᐊᕐᑕᐅᓂᖓ ᕿᐱᓗᑦᑕᐅᓯᒪᔪᖅ ᑌᒪᖕᖓᓂᓪᓗ ᓄᕐᖃᖓᑦᓱᓂ. ᑯᐯᑉ ᑲᕙᒪᖓ ᐅᒃᑯᐃᖔᖏᓐᓇᓂᕋᕐᑐᖅ ᑕᒪᓐᓇ ᓯᕗᓂᕐᒥ ᐱᓇᓱᐊᕐᑕᐅᒍᒪᑉᐸᑦ.